- Tíðindi, mentan og ítróttur
Krevja at álopsmaðurin verður vístur av landinum
![](https://kvf.fo/sites/default/files/styles/grein-ovasta-mynd/public/mette_15.jpg?itok=R_8scIVf)
Danska ákæruvaldið krevur, at 39 ára gamli maðurin, sum sló danska forsætisráðharran Mette Frederiksen, verður vístur úr Danmark og ikki fær innferðarloyvi komandi seks árini.
Tað stendur í ákæruritinum móti pólska manninum, sum er ákærdur fyri við knýttum neva at hava sligið Mette Frederiksen á høgru øksl. Tað skal hann hava gjørt á Kultorvet í Keypmannahavn fríggjadagin 7. juni, tá Mette Frederiksen var á veg til eina kaffiavtalu við eina vinkonu.
Hon hevði lívverjar hjá sær, men kortini eydnaðist tað manninum at sleppa so nær at henni, at hann fekk sligið hana á økslina.
Maðurin var eftir øllum at døma ávirkaður av rúsevnum og rúsdrekka. Hann noktar seg sekan.
Málið kemur fyri býarrættin í Keypmannahavn 6. og 7. august.