Yvir 50.000 vilja hava Watson leysan

Yvir 50.000 fólk í øllum heiminum hava skrivað undir áheitan á danska forsætismálaráðharran, Mette Frederiksen, undir yvirskriftini "Free Paul Watson." 

Tey heita á forsætismálaráðharran um at lata Paul Watson leysan.

Captain Paul Watson Foundation stendur fyri tiltakinum, skrivar Ritzau.

Paul Watson er í varðhaldi í Nuuk, har hann skal vera til 15. august.

Japan hevur biðið Danmark um at fáa hann útflýggjaðan.

73 politikarar í tíggju londum í Evropa hava staðiliga heitt á Mette Frederiksen um at lata Paul Watson leysan alt fyri eitt.

Brotsmaður

Ein føroyskur politikari, fólkatingmaðurin Sjúrður Skaale, sigur nakað heilt annað.

Hann sigur stutt og greitt, at Watson skal viðgerast sum tann brotsmaður, hann er.

Tað hevði verið heilt burturvið, absurd, at latið hann leysan, sigur Sjúrður Skaale í tíðindaskrivi, sum er sent donskum miðlum.

Hann tekur tó ikki støðu til, um Watson skal útflýggjast Japan.

Danmark er eitt rættarsamfelag, og kann tí ikki lata ein brotsmann leysan, sigur Sjúrður Skaale.