- Tað hevur stóra ávirkan á lundan

Jarðareigararnir í Mykinesi umhuga at lata gøtuna uppaftur, sum gongur út í hólman. Tað kom fram í útvarpstíðindunum í KvF leygarkvøldið, tá Finn Hansen, hagastýrisformaður í haganum, har Lambin, har størsta lundalandið í Føroyum, liggur.

Eingin avgerð er tikin enn, sigur Finn Hansen, sum leggur afturat, at eigararnir hugsa um fuglin fyrst og fremst.

Tað ger Silas Olofson, fuglaserkønur, eisini og sambært honum er eingin ivi um at tað ávirkar fuglin nógv, um gøtan verður latin uppaftur.

Saman við Jón Aldará hevur Silas Olofson júst verið í Mykinesi og í Mykineshólmi og hugt eftir, hvussu fuglurin hevur tað, og eftir at hava verið har er hann enn meira sannførdur um at tað hevur stóra ávirkan á lundan, um fólk er í økinum.

- Eg gjørdi eina roynd við at seta meg í Lambanum í ein hálvan tíma, og bara tað, at eg sat har fekk fuglin at halda seg burtur. Hann tveitti fiskin og kom ikki inn fyrr enn eg var farin, sigur Silas Olofson.

Beint omanfyri Lamban er Rógvin, har kikarin stendur til ferðafólkini at brúka, og har er nógv fólk alt summarið. Men tey standa ikki í flogrætninginum hjá fuglinum og tey eru eisini hegnað frá, so tey ikki koma inn í økið.

Silas Olofson skilir væl, at fólk vil sleppa aftur í hólman, tí har er náttúrvakurt, men skal gøtan latast uppaftur, so hevði kanska verið skilagott við einari heilt nýggjari brúgv, longur uppi, so fólk ikki fara at ganga ígjøgnum lundalandið í Lambanum, og ístaðin koma at ganga í erva, eisini tá tey koma út í hólman. Um tað ikki ber til, tí tað er dýrt at byggja nýggja brúgv, so mælir hann eigarunum til at hugsa seg væl um áðrenn nøkur avgðerð verður tikin. Tí hon fær stóra ávirkan á fuglalívið, sigur hann.

Lurta eftir innslagnum um evnið, sum var í tíðindasendingini klokkan 14.00.