Heilsustarvsfólk í India mótmæla

Heilsustarvsfólk í India løgdu í gjár arbeiðið niður í samhuga við 31 ára gamla kvinnuliga læknan, sum í síðstu viku bleiv neyðtikin og dripin, tá hon var í starvsvenjing í stórbýnum Kolkata.

Tað skrivar NTB.

31 ára gamli læknin var álopin í einum sovisali. Ein maður, sum arbeiðir á sjúkrahúsinum í Kolkata, er handtikin og varðhaldsfongslaður í sambandi við málið.

Drápið hevur elvt til mótmæli millum heilsustarvsfólk. Málið verður av summum samanborið við eitt mál í 2012, tá ein 23 ára gomul lesandi bleiv hópneyðtikin og dripin í einum bussi í høvuðsstaðnum New Delhi.

Læknarnir og kvinnubólkarnir, sum mótmæla, eru óðir um, at herdar lógir ikki hava megnað at minka vaksandi harðskapin móti kvinnum.

Í 2022 blivu 90 neyðtøkur fráboðaðar dagliga í India, vísa almenn hagtøl. 

Indiskir læknar krevja, at stjórnin setir í verk lóg, sum verjir heilsustarvsfólk móti harðskapi.