Nú verður glas sett í stórhøllina Við Tjarnir

Tað gongur við rúkandi ferð at byggja nýggju stórhøllina við Tjarnir í Hoyvík. 

Talan er um ein bygning, sum verður lætt broytiligur, skilt soleiðis, at tað er lætt og skjótt at broyta uppseting frá venjingarhøll til ein hondbóltslandsdyst, til eina konsert ella eitt samfelagsmøti.

Við Tjarnir verður í trimum hæddum og hevur eina gólvvídd upp á 8.100 fermetrar.

2.200 sitipláss og 500 standipláss vera til hondbóltsdystir og annan innanduraítrótt, meðan tað kunnu vera 3.200 sitipláss ella 4.700 standipláss til konsertir. 

Herfyri bleiv eisini greitt, at Regin W. Dalsgaard verður fyrsti stjóri í stórhøllini Við Tjarnir. 

Við Tjarnir

Seta 800 fermetrar av glasi í 

Tað er byggifyritøkan Articon, ið stendur fyri at byggja við Tjarnir, og Articon hevur lagt nakrar myndir út av arbeiðinum í sambandi við, at tað verður gjørt klárt at seta vindeygu og glasfasaduna í stórhøllina. 

Fyrstu vindeyguni og glasfasadurnar komu til landið í vikuni. Í alt 800 fermetrar av glasi skulu setast í stórhøllina við Tjarnir, og arbeiðið verður væntandi liðugt tann 1. oktober, skrivar Articon. 

Tað er danska fyritøkan Tarpgaard A/S, sum er heimahoyrandi í Fredericia, ið stendur fyri arbeiðinum. 

Eftir ætlan, so skal stórhøllin við Tjarnir í Hoyvíkshaganum standa liðug síðst í januar 2025.

Við Tjarnir

Fleiri myndir av byggingini kunnu síggjast á Facebook-vanganum hjá Articon.