- Tíðindi, mentan og ítróttur
Grønlendingar vænta minni inntøkur frá fiskivinnuni næsta ár
![](https://kvf.fo/sites/default/files/styles/grein-ovasta-mynd/public/raelkjur.png?itok=EYymKlnX)
Í Grønlandi vænta tey minni inntøkur frá fiskivinnuni næsta ár.
Í fíggjarlógaruppskotinum fyri 2025 metir grønlendska landsstýrið, at inntøkurnar frá avgjøldunum á fiski og skeljadjórum - sonevnda tilfeingisrentan - fer at lækka 12 prosent næsta ár sammett við 2023.
Tað skrivar grønlendska blaðið, Sermitsiaq.
Tað eru fleiri orsøkir til, at landsstýrið væntar, at hesar inntøkurnar lækka.
Minni rækjukvota
Ein er, at rækjukvotan í Vesturgrønlandi minkar 7.500 tons næsta ár. Hon minkaði eisini 7.500 tons í ár. Við lækkaðari kvotu, minkar væntandi tilfeingisrentan frá rækjufiskiskapinum.
Ein onnur orsøk er, at prísurin á fiskavørum er tengdur at búskapinum í keyparalondunum.
"Útflutningsprísurin á fiskavørum úr Grønlandi er ikki støðugur, men er knýttur at útboði og eftirspurningi á heimsmarknaðinum. Tí er ongin vissa fyri, at ein ávís fiskavøra kann seljast fyri sama prís næsta, sum hon var seld fyri í ár", stendur í fíggjarlógaruppskotinum, sum var lagt fram herfyri.