Fregnartænastur: Russar royna at fremja sabotasju í Norðurlondum

Fregnartænastur í Norðurlondum ávara um russiskar royndir at fáa brotsmannalið at fremja sabotasju í Norðurlondum. 

Talsfólkið fyri svensku fregnartænastuna, Säpo, Gabriel Wernstedt, sigur í samrøðu við svenska Aftonbladet, at talan er um nýtt fyribrigdi, har Russland roynir at útvega lokalar brotsmenn at fremja sabotasju og skapa órógv í Natolondunum - eisini í Norðurlondum.

- Vit hava sæð ábendingar úti í heimi, har brotsmannalið verður brúkt sum millumlið, men ikki í Norðurlondum, sigur Gabriel Wernstedt, sambært danska TV2.

Politiets efterretningstjeneste, PET, fregnartænastan hjá donsku løgregluni

Kaðlar fingið skaða

Stjórin fyri norsku fregnartænastuna, Beate Gangås, váttar somuleiðis, at fleiri hendingar verða kannaðar.

Í Norðurlondum hava dømi verið um kaðlar millum Svalbard og norska meginlandið, og kaðlar á flogstøðini Evenes í Nordland, sum hava fingið skaða.

Í norska býnum Narvik og í svenska býnum Kiruna vóru tokvognar avsporaðir.

Fregnartænasturnar hava illgruna um, at Russland hevur hevur skipað fyri óhappunum.

- Vit vita, hvussu russiska fregnartænastan brúkar lokal brotsmannalið. Eg verði ikki meira ítøkilig enn tað, at russar brúka sosialar miðlar og talgildar samskiftisloysnir, sigur Beate Gangås, við TV2.

Hon fegnast samstundis um, at gott samstarv er millum trygdartænasturnar.

Hon vil ikki siga, hvat russar hava gjørt í Noregi, men váttar, at russiska fregnartænastan hevur skipað fyri fleiri hendingum í Nato-londum.

PET ávarar eisini

Í Danmark ávarar fregnartænastan PET eisini um støðuna. 

- PET tekur støðuna í størsta álvara og hevur, orsakað av støðuni, hert munandi um uppmerksemið um hóttanina, tí vit kunnu ikki vísa aftur, at tað eisini kann henda á danskari jørð, sigur PET í skrivligum svari til danska TV2.