- Tíðindi, mentan og ítróttur
Ísland: Makrelurin sveik
![](https://kvf.fo/sites/default/files/styles/grein-ovasta-mynd/public/vlcsnap-2023-10-25-10h55m27s708.png?itok=11lkQj1n)
Íslendsku skipini eru nú mestsum givin at leita eftir makreli og eru í staðin farin á sild.
Tað skrivar íslendska kringvarpið RÚV.
Íslendski fiskiskapurin eftir makreli hevur verið vánaligur í ár - so vánaligur, at ein fjórðingur, ella 30.000 tons, av íslendsku makrelkvotuni uppá tilsamans 120.000 tons enn ikki er fiskaður.
Siggeir Stefánsson, framleiðslustjóri hjá Ísfelagin í Tórshøfn, sigur við RÚV, at tað er álvarsligt, at makrelfiskiskapurin hevur verið so vánaligur og at kvotan ikki verður fiskað upp, og at tað sjálvandi hevur stóra fíggjarliga ávirkan fyri reiðaríini, kommunurnar og tey, sum starvast í vinnuni.
Hann sigur, at makrelfiskiskapurin ikki er helt av enn, men at uppsjóvarskipini nú venda sær meira móti sildini, og at tað hevur alstóran týdning, at sildafiskiskapurin fer at roynast væl, nú makrelurin sveik.
Higartil sær út til, at sildafiskiskapurin fer at hilnast betur, men sum søluvøra er hon ikki eins góð og makrelurin.
"Sildin er ein góð umsetilig vøra, men er ikki ein so global vøra sum makrelurin, og tí er marknaðurin fyri sild meira avmarkaður," sigur Siggeir Stefánsson við RÚV.