Hildið verður fram at skerja ríkisveitingina

Sum er, er ikki grundarlag fyri endurskoða ætlanina um at skerja ríkisveitingina.

Tað sigur Aksel V. Johannesen, løgmaður, í svari til Bárð á Steig Nielsen, løgtingsmann, sum spurdi, um hildið verður fæst við ætlanina at skerja ríkisveitingina, hóast búskaparstøðan er munandi broytt.

Løgmaður sigur, at við einum mettum búskaparvøkstri upp á 3,3 prosent, sum er langt frá einum negativum búskaparvøkstri, er ikki grundarlag fyri at endurskoða ríkisveitingina.

Men broytist støðan, og búskaparvøksturin verður negativur, verður ætlanin um ríkisveitingina endurskoðað, sigur Aksel V. Johannesen. 

Í samgonguskjalinum millum Javnaðarflokkin, Tjóðveldi og Framsókn er semja um, at ríkisveitingin skal lækka 25 milliónir kr. um árið í valskeiðnum, ella tilsamans 100 milliónir kr. 

Tó skal ætlanin endurskoðast, um búskaparliga støðan broytist, og vøksturin verður negativur, stendur eísini í samgonguskjalinum.

Les alt svarið her.