Ísrael: Hava oyðilagt fleiri enn 100 skotpallar í Libanon

Ísraelski herurin, IDF, vil vera við, at hann hevur oyðilagt fleiri enn 100 skotpallar til rakettir ymsastaðni í syðra partinum av Libanon.

Sambært ísraelska herinum vóru skotpallarnir løddir og ætlaðir Ísrael.

30 mál hjá Hizbollah-rørsluni vóru rakt í álopunum, sum Ísrael framdi í Libanon í gjár.

IDF skrivar á sosiala miðlinum X, at álopini eru ein roynd at gera førleikarnar hjá Hizbollah veikari at fremja yvirgang og at oyðileggja undirstøðukervið í syðra parti av Libanon.

- IDF arbeiðir fyri, at tað verður friðarligt í norðara parti av Ísrael, og at tað verður møguligt hjá fólki at venda aftur til heim síni.

Mikudagin sendi Hizbollah rakettir inn í Ísrael, eftir at kallingartól, sum Hizbollah-rørslan í Libanon átti, sprongdust í luftina.

Hizbollah leggur Ísrael undir at hava skipað fyri spreingingunum.