Verður verri hjá ungum at fáa fatur á orkudrykkjum

Landsstýriskvinnan í heilsumálum, Margit Stórá, sigur, at tørvur er á munagóðum átøkum og reglum á økinum, so nýtslan av orkudrykkjum, serliga hjá børnum og ungum, kann tálmast.

Tøl frá Heilsustýrinum vísa, at innflutningurin av orkudrykkjum er vaksin munandi frá 2010 til 2021.

Landsstýriskvinnan hevur sett gongd á málið og samskiftir við Høgna Hoydal, landsstýrismann í vinnumálum.

Tað segði landsstýriskvinnan í heilsumálum, tá ið munnligir fyrispurningar vórðu svaraðir í tinginum hósdagin

Í desembur 2014 kom Fólkaheilsuráðið við tilmæli til landsstýrismannin í heilsumálum um, at orkudrykkir eiga at standa fyri seg í handlunum.

Væl og virðiliga eigur at verða sagt við skeltum, at í drykkuunum eru stimbrandi evni, sum kunnu vera heilsuskaðilig í stórum nøgdum, serliga saman við rúsdrekka. 

Eisini varð mælt frá, at ung undir 18 ár drekka hesar drykkir.

Heilsustýrið hevur boðað landsstýriskvinnuni frá, at tað stendur við hesi skjótt 10 ára gomlu tilmælini hjá Fólkaheilsuráðnum, og tey vera dagførd í næstum.

Heilsufrøðiliga starvsstovan segði í 2017, at orkudrykkir ikki eru ætlaðir børnum at drekka.

Her sæst gongdin í innflutningi av orkudrykkjum

heilsustyrid.png