Óbroytt veiðitrýst á toski og hýsu síðani 1997

Veiðitrýstið á toski og hýsu er nøkulunda tað sama frá 1997 til 2023, um sveiggini ikki vera tikin við, sigur Havstovan.

Men einki skipað og dagført tilfar er, sum lýsir veiðiorku og veiðievni í flotanum í fiskidagaskipanini frá 1997 til í dag.

Tað sigur Dennis Holm, landsstýrismaður, í svari til Bárð á Lakjuni, løgtingsmann, sum spurdi um fiskidagar, friðaðar og stongdar fiskileiðir og veiðitrýst.

Heldur ikki eru tøl um húkatal og troltímar á landgrunninum í fjør og í fiskiárinum 1997-98.

Fuglberg, Skoraberg, Fuglberg og Skoraberg, ísfiskatrolari, ísfiskatrolarar

Trolararnir høvdu 411 færri fiskidagar í fjør enn í 1997-98.

Færri fiskidagar

Trolarar høvdu 411 færri fiskidagar í 2023 enn í 1997-98.

Stóru línuskipini høvdu 681 færri dagar og útróðrarbátar 22.304 færri fiskidagar.

Bólkarnir vóru tó nakað øðrvísi í 1997-98 enn teir eru nú.   

Fiskiførini omanfyri 15 tons í fiskidagaskipanini eru nógv færri í dag enn í 1997-98, stendur eisini í svarinum. 

Dennis Holm sigur, at sær kunnugt, eru ongar dagførdar kanningar tøkar, sum kundu givið betri grundarlag fyri at lýsa støðuna og gongdina í fiskidagaskipanini.