Mentanarvirðislønirnar verða handaðar í Varpinum

Varpið í Klaksvík verður karmur um mentanarvirðislønir landsins 2024.

Tað boðar Mentamálaráðið frá. 

Árliga tiltakið verður í nýggja mentarnarhúsinum í Norðoyggjum 23. oktober, tá Sirið Stenberg, landsstýriskvinna í almanna- og mentamálum, handar virðislønir landsins til lista- og mentafólk.

Tríggjar virðislønir verða handaðar:

Mentanarvirðisløn landsins, sum er 150.000 kr., verður latin fyri at heiðra føroyskt mentafólk sum tøkk fyri útint listarligt avrik.

Heiðursgáva landsins, sum er 75.000 kr., verður latin teimum, ið hava virkað til frama fyri mentanarlig virði, sum hava týdning fyri føroyska mentan, list og mentanararv.

Serstøk virðisløn, sum er 50.000 kr., verður latin listafólki, mentafólki ella felagsskapi eftir landsstýrisfólksins egnu avgerð.

Tiltakið er alment og ókeypis.

Kringvarpið sendir beinleiðis frá tiltakinum.