Greiðari viðurskifti um parkeringsplássini við Lívdina

Tórshavnar kommuna fer at seta seg í samband við samkomuna Lívdina í Hoyvík fyri at fáa greiðari viðurskifti fyri parkeringsbásarnar og greiða skelting, sum vísir, hvørji parkeringspláss eru almenn, og hvørji hoyra serskilt til samkomuna. 

Tað sigur Heðin Mortensen, borgarstjóri, í tíðindaskrivi. 

Hann vísir aftur niðurstøðuni hjá Kommunala eftirlitinum um, at kommunan letur ólógligan stuðul til samkomuna, um kommunan ikki kunnar um, at allir borgarar kunnu brúka parkeringsbásarnar fram við Vegnum langa, har samkoman heldur til.

Eru til allar borgarar

Sambært Heðini Mortensen, er tað júst ætlanin hjá kommuni, at básarnir eru til allar borgarar. Og tí er einki ólógligt í hesum, sigur hann.

- Kommunala eftirlitið vísir í niðurstøðu sínari á, at leiðslan í samkomuni skal hava ført fram, at samkoman hevur ræðisrættin á perkeringsplássunum.

Hesum er kommunan ikki samd í, skrivar Heðin Mortensen, sum vísir á, at helvtin at parkeringsplássunum liggja í kommunalum øki, sum er lagt av til veg.