Semingsroyndin byrjar í morgin

Í morgin klokkan 9 byrjar semingsroynd millum Starvsfelagið øðrumegin og Fíggjarmálaráðið og Kommunala Arbeiðsgevarafelagið hinumegin.

- Vit hava tosað við báðar partar, og eg vænti, at tað ber til at fáa semju, sigur Terje Sigurðsson, semingsmaður.

Fríggjadagin hevði Semingsstovnurin fund við Starvsfelagið, og í gjár var fundur við Fíggjarmálaráðið og Kommunala Arbeiðsgevarafelagið.

Jaligir fundir

- Tað vóru jaligir fundir, har partarnir løgdu fram síni sjónarmið. Eg haldi ikki, at partarnir eru so langt frá hvørjum øðrum, men lat okkum nú fáa at síggja, sigur Terje Sigurðsson.

Semingsmaðurin vónar at kunna leggja fram semingsuppskot rímiliga skjótt, sum partarnir so skulu taka støðu til.

Partarnir hava havt seks samráðingarfundir, men 31. oktober slitnaðu samráðingarnar, og Semingsstovnurin varð boðsendur.