Ogn og skuld í Faroe Origin flutt til tvey nýggj partafeløg

Ávis ogn og skuld hjá partafelagnum Faroe Origin í Runavík er flutt til tvey nýggj partafeløg, sum eita Skipafelag 1 í Syðrugøtu og Royður í Fuglafirði.

Tað hevur Skrásetingin fingið at vita í kloyvingarlýsing.

Stjóri í Skipafelagnum 1 er Bogi Jacobsen.

Stjóri í Royði er Anfinnur Olsen. 

Bæði feløgini hava 500.000 krónur í partapeningi.

Endamálið hjá báðum feløgum er at reka fiskivinnu og annað virksemi í tí sambandi.

Eginognin negativ

Óhefti grannskoðarin hjá Faroe Origin skrivaði í roknskapinum í fjør, at eginogn felagsins er vorðin negativ.

Tí eru týðandi óvissur um framhaldandi rakstur.

Felagið skrivar sjálvt, at felagið skal kloyvast, so tað bara hevur tvey fiskavirki eftir.

Skipini og skuld teirra vera kloyvd til onnur feløg.

Hetta fer at endurreisa eginognina hjá Faroe Origin, sigur felagið.