Fyrr stýrdu tær heimunum, men vilja nú stýra heiminum

Sjálvt um talið av kvinnum í býráðnum í Fuglafirði tvífaldaðist seinasta val, so halda dyppikonurnar Kristina Gry Berg og Birgit Reinert-Petersen hetta ikki vera nakað at breggja sær av, tí at fara frá einari til tvær kvinnur er minsta tvífalding, sum er gjørlig innan støddfrøðina.

Hóast miðaltalið av kvinnuligari umboðan í føroysku kommununum er 36%, so sita kvinnurnar í 22% av sessunum í kommunustýrinum í Fuglafirði og tað er ikki nóg gott halda tær. 

- Vit tátta í at ein triðingur av valevnunum eru kvinnur hesaferð. Nógv av teimum eru góð, so kanska vit fáa nakrar teirra inn hesaferð. Um ikki vit atkvøða fyri teimum, so koma tær ikki inn, sigur Kristina Gry Berg, sum er fyrrverandi forkvinna í Demokratia og hevur verið við til at stovna ein av listunum í Fuglafirði fyri nøkrum árum síðani.

- Samfelagið her er so mansdominerað, so her kemur at taka langa tíð, til kvinnurnar koma til valdið, heldur Birgit. 

Men kvinnurnar halda seg framat, kanska serliga í neystinum, har dippararnir skifta, tí fleiri teirra stilla upp hesaferð og hetta fær kjakið at ganga væl.

Vallyftini sum heild í Fuglafirði geva tær báðar Birgit og Kristina tó ikki nógv fyri.

- Tað koyrir í somu rillu sum fyrr, sum ein gomul gramofonpláta, suffar Birgit og sigur frá veljarafundi í farnu viku. - Tað var so háfloygt og snúið seg bara um miliónir og milliónir. Sambýli og eldrabýli, íbúðir og skúlar. Eg sakni at tey tosaðu um tey smáu tingini, sum kundu glett nógvar borgarar, so sum parkeringsviðurskifti, kloakkir, gøtur og benkur til dømis, leggur hon afturat.

Her halda tær tó, at tað hevði gjørt mun, um fleiri kvinnur komu inn, tí teirra sjónarmið eru ymisk frá monnunum, og tær hugsa skynsamari enn nógvir menn.