Elsa Berg verður borgarstjóri og Heðin Mortensen varaborgarstjóri

Teir tríggir flokkarnir siga í tíðindaskrivi nú eftir midnátt, at Tjóðveldi, Javnaðarflokkurin og Borgaralistin hava í kvøld avtalað at skipa samgongu í Tórshavnar býráð. 

Tjóðveldi fær borgarstjórasessin, og Javnaðarflokkurin fær varaborgarstjórasessin.  

Samgonguflokkarnir eru somuleiðis samdir um at raðfesta hesi høvuðsøki: Bústaðir, dagstovna– og eldraøkið og umhvørvið. 

Næsta stig verður nú at kalla inn til eyka býráðsfund at skipa nýggja býráðið, og síðan verður farið undir at orða samgonguskjal millum flokkarnar.