Flestu skaðar í Vágum

Løgreglan hevur higartil fingið 35 skaðafráboðanir eftir illveðrið í nátt og morgun. Ringa veðrið í nátt hevur serliga gjørt um seg í Vágum, har ein triðingur av skaðafráboðanunum eru. 

Í Steigarbrekku í Sandavági er tekjan rivin á einum sethúsi, og takplátur flúgva í storminum. Løgreglan heitir tí á fólk í økinum um at halda seg innandura, tí flúgvandi takplátur kunnu vera sera vandamiklar. Sambært løgregluni er enn ov tíðliga at siga, hvønn skaða rivna tekjan hevur gjørt á onnur hús og lutir í økinum.

Í Miðvági er línuskipið Havbúgvin við at slíta. Skipið hongur í einum trossa, og Vága Bjargingarfelag og onnur royna at fáa tamarhald á støðuni, so skipið ikki slítur. Men arbeiðið er trupult, tí framvegis er nógvur vindur, upplýsir vakthavandi hjá løgregluni.

Nógvastaðni eru vegaristirnar tiptar av ísi og gleri, og tí er eisini nógv vatn á vegunum. 

Landsverk upplýsir, at koyrilíkindini eru sera vánalig um alt landið.