Trump ætlar at leggja toll á allar vørur úr Meksiko og Kanada

Eitt tað fyrsta, sum Donald Trump fer at gera, eftir at hann í januar hevur tikið við embætinum sum amerikanskur forseti, er at seta 25 prosent toll á allar vørur úr Meksiko og Kanada.

Tað skrivar Donald Trump sjálvur á sosiala miðlinum Truth Social.

Endamálið er fyrst og fremst at steðga innflutninginum av fentanyl - eitt evni, sum er millum 75 og 100 ferðir so sterkt sum morfin - og sum í stórum mongdum kemur til USA úr Meksiko.

Tað er einki nýtt í, at Donald Trump ætlar at hækka tollin á innfluttar vørur úr grannalondunum.

Noyðist at svara aftur

Í farna mánaði segði meksikanski fíggjarmálaráðharrin Marcelo Ebrard í meksikanskum útvarpi, at um onkur áleggur sær 25 prosent í tolli, noyðist hann eisini at svara aftur við tolli.

Undir valstríðnum segði Donald Trump eisini, at hann møguliga fór at leggja upp í 60 prosent toll á kinesiskar vørur.

Mánakvøldið ávaraði ein talsmaður hjá kinesisku sendistovuni í Washington Trump um ikki at byrja eitt handilskríggj.

"Kina heldur, at kinesiskt-amerikanskt samstarv um búskap og handil tænir báðum pørtum. Eingin fer at vinna eitt handilskríggj ella eitt tollkríggj," verður sagt av sendistovuni.