Senda fangar til Estlands

Tað er ikki longur pláss fyri fleiri fangum í svenskum fongslum, og tí arbeiðir svenska stjórnin við at fáa í lag eitt samstarv, har til ber at senda fangar til fongsul uttanlands.

Eitt av teimum støðunum kundi verið Estland.

Løgmálaráðharrin í Svøríki, Gunnar Strömmer, var í gjár í høvuðsstaðnum í Estlandi, Tallinn, har hann hevði fund við løgmálaráðharran í Estlandi um málið. 

Hetta skrivar DR, sum endurgevur Sveriges Radio.

Í fjør mælti svenska kriminalforsorgin millum annað til, at Svøríki skal leiga fongsulspláss uttanlands fyri at loysa plásstrupulleikan.

Í Danmark hava tey eisini umrøtt møguleikan leiga fongsulspláss uttanlands, tí har hava tey eisini plásstrupulleikar.

Í mai samtykti tjóðartingið í Kosovo, at frá 2026 kann Danmark leiga fangapláss í landinum og harvið senda fangar til Kosovo.