Altingsvalið: Fimm flokkar komu ikki upp um tinggáttina

Samfylkingin gjørdist størsti flokkur á altingsvalinum leygardagin, og í dag hitta forfólkini í teimum seks flokkunum, sum nú eru í altinginum, forsetan

Góður hýrur á valveitsluni hjá Samfylkingini leygarkvøldið. Nógv vildu hálsfevna forkvinnuna, Kristrún Frostadóttir.

Mynd: RÚV, íslendska kringvarpið

Høgni Djurhuus

02.12.2024 - 08:16

Fimm av teimum 11 flokkunum, sum stillaðu upp til altingsvalið leygardagin, komu ikki upp um tinggáttina.

Teirra millum eru tey Vinstru grønu, sum hava verið í ríkisstjórnini í meira enn sjey ár í hesum umfarinum og enntá havt forsætismálaráðharran næstan øll sjey árini.

Flokkurin hevur verið í altinginum síðani hann var stovnaður í 1999.

Hann var størstur í 2009, tá hann fekk 14 tingfólk.

Á valinum nú fekk hann bara 2,3 prosent.

Svandis Svavarsdóttir, Vinstri-grøni flokkurin í Íslandi

Svandís Svavarsdóttir hevur verið forkvinna í Vinstru grønu seinastu tíðina.

Samfylkingin vann

Sosialdemokratiski flokkurin Samfylkingin vann altingsvalið. Hann fekk 20,8 prosent, næstan dupult so nógv sum í 2021.

Samfylkingin hevur nú 15 tingfólk, níggju fleiri enn hon hevði.

Næststørsti flokkur er Sjálvstæðisflokkurin, sum fekk 19,4 prosent, men hann misti tveir tingsessir.

Í dag fara forfólkini í teimum seks flokkunum, sum nú eru í altinginum, at hitta forsetan, sum eftir at hava tosað við øll, fer at biðja eitt teirra skipa stjórn.