Fleiri vilja hava Støre frá

Tað gongur ikki væl hjá norska Arbeiðaraflokkinum. 

Nýggjasta veljarakanningin gevur flokkinum bara 16,5 prosent av atkvøðunum, um val hevði verið til stórtingið í dag. Hetta er nógv verri enn úrslitið á valinum í 2021, tá ið Abeiðaraflokkurin fekk 26,3 prosent av atkvøðunum.

Jonas Gahr Støre, formaður í Arbeiðaraflokkinum, gjørdist forsætisráðharrin eftir valið seinast.

Hann er tó ikki so væl lýddur av øllum í flokkinum. Og nú tað gongur so illa í veljarakanningunum, eru fleiri røddir innanfloks, sum vilja hava hann frá, skriva fleiri norskir miðlar.

Tonje Brenna

Tonje Brenna, næstforkvinna í Arbeiðaraflokkinum, hevur fingið boð um at vera til reiðar at taka við, um Jonas Gahr Støre leggur frá sær. (Mynd: Romerikes Blad)

Leiðslan vil hava hann frá

Norska TV2 skrivar, at fleiri í ovastu leiðsluni í Arbeiðaraflokkinum hava heitt á Støre um at leggja frá sær, bæði sum formann í flokkinum og sum forsætisráðharra.

Tey hava eisini heitt á Tonju Brenna, næstforkvinnu í Arbeiðaraflokkinum, um at gera seg til reiðar at taka við, um Støre fer frá.

Jonas Gahr Støre vil ikki siga, um hann fer at gera eftir áheitanini um at leggja frá sær.

- Vit hava fingið eina vánaliga veljarakanning, men tað fara vit at klára at broyta. Vit fara at royna at venda gongdini, sigur Jonas Gahr Støre við TV2.