Arbeiðsgevararnir taka undir við at hækka pensjónsaldurin

Føroya arbeiðsgevarafelag tekur undir við at hækka fólkapensjónsaldurin í stigum, so hann verður 70 ár hjá fólki, sum eru fødd eftir 31. mars 1972. 

Men felagið heldur tað samstundis vera neyðugt at hugsa um tey, sum eru slitin av nógvum árum á arbeiðsmarknaðinum.

Umráðandi er, at vit hava góðar skipanir at lofta teimum, sum ikki megna at vera á arbeiðsmarknaðinum heilt fram til fullan pensjónsaldur.

Neyðugt er at hækka fólkapensjónsaldurin fyri at bøta um fíggjarliga haldførið, heldur Arbeiðsgevarafelagið.  

Arbeiðsgevarafelagið tekur eisini undir við, at aldurin fyri framskundaða pensjón hækkar hálvt ár upp í 65 ár 1. juli 2030.