Fíggjarlógin viðgjørd í løgtinginum í dag

Fíggjarlógaruppskotið hevur 120 milliónir krónur í halli, nú tað er komið aftur úr fíggjarnevndini hjá løgtinginum.

Tað eru 37 milliónir krónur meira enn fíggjarlógaruppskotið, sum Ruth Vang, landsstýriskvinna, legði fyri løgtingið 30. september.

Samgongumeirilutin í fíggjarnevndini hevur eina røð av broytingum, og harumframt eru broyttar inntøkumetingar tiknar við í álitið, sum kom fríggjadagin.

1,1 mió. kr. til Hagstovuna

Millum broytingaruppskotini frá samgongumeirilutanum í fíggjarnevndini eru 1,1 millión krónur afturat til Hagstovuna, Málráðið fær 300.000 krónur afturat, og nýggja sjósavnið á Argjum fær 2,5 milliónir krónur.

Andstøðuminnilutin hevur eisini nógvar broytingar.

Við teirra broytingum og raðfestingum verður undirskotið 112 milliónir krónur.

Tingfundurin í dag er klokkan tíggju.

Fimm mál eru í dagsskránni.

Teirra millum er integratiónslógin, sum skal hava aðru viðgerð.