Brekumboðið til verka

Tað hevur drigið út, og bíðað hevur verið eftir tí í 15 ár, men næsta ár fer nýggja brekumboðið at virka og at hava óheft eftirlit við, at føroysk lóggáva livir upp til altjóða brekrættindasáttmálan.

 - Men hóast ein millión er játtað í 2025 og ein millión aftrat í 2026, er tað ikki fyrr enn nú, at hetta arbeiðið byrjar.

Tað sigur Tóra við Keldu, forkvinna í MEGD, sum er fegin um, at brekumboðið nú loksins kann fara til verka.

 - Vit kunnu siga, at líka síðan brekrættindasáttmálin var viðurkendur av Føroya Løgtingi einmælt í 2009, so hava vit í tráð við tær frágreiðingarnar, sum vit hava sent inn til ST í 2014 og eisini nú í ár, lagt dent á, at vit í Føroyum einki eftirlit hava havt við, hvussu brekrættindasáttmálin verður settur í gildi her í Føroyum, sigur Tóra við Keldu.

Men nú kann arbeiðið hjá brekumboðnum byrja.