Smyril Line: "Ein syrgiligur dagur hjá okkum øllum"

Smyril Line váttar nú tað, ið danska TV2 skrivaði fyrr í kvøld, at ein av manningini, ið var í maskinrúminum umborð á farmaskipinum Glyvursnesi, er deyður. 

"Eldurin umborð á Glyvursnesi er sløktur eftir spreingingina fyrr í kvøld. Tríggir av manningini vóru í maskinrúminum, tá spreingingin hendi, og hóast lívbjargandi viðgerð andaðist ein teirra. Avvarðandi hava fingið boð," skrivar Jens Meinhard Rasmussen, stjóri í Smyril Line, í tíðindaskrivi. 

Hinir báðir, ið vóru í maskinrúminum, eru á sjúkrahúsi og fáa viðgerð fyri brunasár og roykeitran.

TV2 hevur fingið váttað frá løgregluni í Norðurjútlandi, at støðan hjá øðrum er kritisk, og at talan er um føroyingar. 

Sambært Smyril Line, so er manningin flutt av skipinum og fær kreppuhjálp.

Eisini tey avvarðandi fáa tilboð um kreppuhjálp. 

"Hetta er ein syrgiligur dagur hjá øllum okkum í Smyril Line, og okkara tankar eru hjá teimum avvarðandi," skrivar Jens Meinhard Rasmussen, stjóri í Smyril Line, í tíðindaskrivinum.