Miðal kommunuskatturin er nú 19,97 prosent

Føroya Arbeiðsgevarafelag fegnast um, at seks kommunur hava valt at lækka kommunuskattin, og at 11 kommunur hava hækkað barnafrádráttin.

Slíkar broytingar virka við til at gera føroyska persónskattin og arbeiðsmarknaðin meira kappingarføran.

Hetta skrivar Vinnuhúsið á heimasíðuni.

Broytingarnar hava við sær, at miðal kommunuskatturin lækkar úr 20,02 prosentum niður í 19,97 prosent.

Samstundis hækkar miðal barnafrádrátturin úr 8.036 krónur fyri barnið upp í 8.471 krónur barnið.

Hóast talan sostatt ikki er um kollveltandi broytingar, fegnast Føroya Arbeiðsgevarafelag tó um, at gongdin í kommunuskattinum er røtt, og at miðal kommunuskatturin nú fyri fyrstu ferð í nógv ár er komin niður um 20%-markið.

Til samanberingar var miðal kommunuskatturin í 2015 omanfyri 21%.