Lættari og einfaldari at søkja búnaðarstuðul úr landskassanum

Tað skal gerast lættari og einfaldari hjá landbúnaðinum at søkja um stuðul úr landskassanum. 

Tí hevur Uttanríkis- og Vinnumálaráðið gjørt eitt lógaruppskot, sum savnar flestar almennar stuðulsskipanir á einum staði.

Skipanin verður eisini gjørd greiðari, sigur ráðið. 

Gamlar lógir

Stuðul til landbúnaðin er í dag í nógvum lógum og kunngerðum. Elsta lógin er frá 1961.

Fíggjarligu avleiðingarnar fyri landið vera nakað tað sama sum nú, slakar 20 milliónir krónur.

Aftrat teimum kemur stuðulin, sum verður latin sambært lógini um Búnaðargrunnin.

Nýggja stuðulslógin er ein royndarskipan, sum skal vera í fimm ár.