WTO-limaskapur: Nú verður nevndin sett

WTO-limaskapur: Nú verður nevndin sett
Løgmaður og forsætisráðharrin hava sent felags áheitan á Hægstarætt um at seta nevndina, sum skal taka støðu til sjálvstøðugan føroyskan limskap í heimshandilsfelagsskapinum
Tað var á ríkisfundinum í fjør, at løgmaður og forsætisráðharrin samdust um at seta grein 6-nevndina.
 
10.01.2025 - 09:39

Nevndin, sum sambært heimastýrislógini kann setast at loysa trætur, verður nú sett at taka støðu til, um Føroyar kunnu fáa sjálvstøðugan limaskap í heimshandilsfelagsskapinum WTO.

Á ríkisfundinum fyrrapartin hava Aksel V. Johannesen, løgmaður, og Mette Frederiksen, forsætisráðharri, skrivað undir felags áheitan á hægstarætt um formliga at seta nevndina.

Hon skal taka støðu til spurningin: Er limaskapur Føroya í egnum navni í World Trade Organization (WTO) sambæriligur við stjórnarskipanarligu støðu Føroya?

Tað var í sambandi við ríkisfundin í Aalborg síðsta summar, at løgmaður og danski forsætisráðharrin samdust um søguliga stigið, at spurningurin um føroyskan WTO-limaskap skuldi roynast í einari serligari nevnd, sambært grein seks heimastýrislógini.

Hetta var gjørt, eftir at landsstýrið hevði fingið undirtøku frá einari samdari uttanlandsnevnd.

 

Ikki roynt fyrr

Hóast heimastýrislógin hevur nærum 80 ár á baki, hevur hendan grein 6-nevndin ongantíð verið sett áður.

Tí hevur verið neyðugt at fyrireika gjølla, hvussu nevndin skal setast, og hvussu hon skal virka.

Tað hava Løgmansskrivstovan og forsætisráðmálaráðið arbeitt við síðani í summar. Semja er nú um hesi viðurskifti, sum eru lýst í felags áheitanini á Hægstarætt, sum í dag er undirskrivað.

Landsstýrið og danska stjórnin hava, hvør í sínum lagi, valt tvey umboð í nevndina. Í næstum verður kunngjørt, hvørji umboðini í nevndini eru.

Felags áheitanin á Hægstarætt er orðað á donskum og føroyskum, og hon kann lesast her.

 

Hetta sigur § 6 í heimastýrislógini


§ 6 Ivamál um føroyska heimastýrisins ræði í mun til ríkisvaldið verða løgd fyri nevnd, skipað av tveimum limum valdum av ríkisstjórnini, tveimum valdum av landsstýrinum og trimum av hægstarættarpresidentinum valdum hægstarættardómarum; ein teirra verður settur sum formaður. Eru teir fýra av ríkisstjórnini og landsstýrinum valdu limirnir samdir, er málið endaliga avgjørt. Um so ikki er, verður málið avgjørt av teimum trimum hægstarættardómarunum. 


 


 

 

Er kopiera
Nýggjastu sendingar í ÚV
Mánadag 12. mai
Góðan morgun Føroyar
191749
Sunnudag 11. mai
Bolero
191709
Sunnudag 11. mai
Guðstænasta í Haldórsvíkar kirkju
191708
Sunnudag 11. mai
Kallið: "Eg eri herprestur".
191424
Leygardag 10. mai
Jambalaja - 100525
191703
Nýggjastu sendingar í SV
Mánadag 12. mai
Anna FD 564 - teknmálstulkað
191741
Sunnudag 11. mai
Møti úr Stranda missiónshúsi
191725
Sunnudag 11. mai
Andakt
191720
Leygardag 10. mai
Dagur og vika - teknmálstulkað
191687