Eingin útlendskur peningur í grønlendskt valstríð

Grønlendska landstingið vil ikki hava útlendskar pengar í valstríðið, sum skjótt byrjar.

Forkvinnan í landstinginum, Mimi Karlsen, er komin við lógaruppskoti, sum hevur skund, og skal avgreiðast í landstinginum í dag.

Uppskotið skal verja valið í apríl fyri ónevndum og útlendskum peningastuðli.

Landsstýrið hevur biðið um uppskotið, skrivar Sermitsiaq.

Trump er orsøkin til uppskotið

Uppskotið skal forða fyri, at útlendingar leggja seg út í landstingsvalið.

Eingin ivi er um, at stóri áhugin hjá Donaldi Trump fyri Grønlandi, er orsøkin til uppskotið. 

Forboðið verður eisini galdandi fyri ungdómsfeløg og lokalfeløg hjá flokkunum.

Og tað er galdandi fyri fólk, sum stilla upp til fólkatingsval.

Flokkarnir kunnu ikki, sambært uppskotinum, fáa stuðul frá privatum, sum eru størri enn 20.000 kr. og tilsamans 200.000 kr.