Rubio og Lavrov samráðast nú um Ukraina

Fyri lítlari løtu síðani settust amerikanski uttanríkisráðharrin, Marco Rubio, og russiski starvsbróðirin, Sergej Lavrov, við borðið, at samráðast um Ukraina.

Tað vísa myndir úr saudiarabiska høvuðsstaðnum, Riyadh, har fundurin verður hildin.

Partarnir siga, at málið er at betra um sambandið millum USA og Russland, og við samráðing at enda kríggið í Ukraina.

Amerikanarar siga, at fundurin skal halda lív í prátinum um frið í Ukraina, sum amerikanski forsetin, Donald Trump og russiski forsetin, Vladimir Putin, viðgjørdu á telefonfundi í síðstu viku.

Ukraina er ikki boðið við til fundin, og Lavrov segði í gjár, at Evropa heldur einki hevur at gera við samráðingarborðið.