Koyrdi inn í mannamúgvu í Mannheim

Ein bilur hevur koyrt inn í eina mannamúgvu í miðbýnum í týska býnum Mannheim. 

Hetta hendi stutt eftir døgurða í dag.

Í minsta lagi eitt fólk hevur latið lív, og fleiri hava fingið skaða, sigur løgreglan.

Eitt fólk er handtikið, men enn er ógreitt, um fleiri fólk vóru við í álopinum.

Hevði nógva ferð

Fleiri týskir miðlar skriva, at bilurin hevði nógva ferð, tá ið hann koyrdi á fólkini.

Løgreglan hevur á miðlinum X heitt á fólk um at halda seg burtur frá miðbýnum.

Enn er ógreitt, hví álopið hendi. 

Seinastu mánaðirnar hava fleiri bilálop verið í Týsklandi. 

Í mai mánaði í fjør læt eitt løgreglufólk lív, og fleiri fólk fingu skaða í einum kníválopi í Mannheim.