Eirikur í Jákupsstovu: Norðoyggjar hava ynskt sær landsstýrisfólk

"Sirið (Stenberg) hevur gjørt eitt framúr arbeiði sum landsstýriskvinna í almanna- og mentamálum, og tí kenst tað sum øgiliga stórir skógvar at fylla," sigur Eirikur í Jákupsstovu, ið setur seg í landsstýrissessin hjá forkvinnuni í Tjóðveldi, sum nú verður landsstýriskvinna í uttanríkis- og vinnumálum. 

"Tí hevði eg eina kenslu av, at hetta var ein stór uppgáva og ein stór ábyrgd, ið eg átók mær," leggur hann aftrat. 

Eirikur í Jákupsstovu fegnast tó um, at tað var stór undirtøka í Tjóðveldi fyri at vísa á seg sum nýggjan landsstýrismann í almanna- og mentamálum, og at tað er ein góð kensla at hava við sær í embætið. 

Eirikur í Jákupsstovu dylur ikki fyri, at tað hevur verið eitt stórt ynski frá hansara valfelag, Norðoyar Tjóðveldisfelag, at  Norðoyggjar fingu umboðan í landsstýrinum.