Vinnunevndin undrast: Hví brúka pensjónsfeløgunum ikki pengar í Føroyum?

Vinnunevndin undrast á tann lítla áhuga hjá føroysku pensjónsfeløgum, sum nevndin sigur eru væl polstrað, at brúka pengar á føroyska kapitalmarknaðinum.  

Brúk er fyri bæði meira váðafúsum byrjanarkapitali til nýggj feløg, men eisini í breiðari  vinnupolitiskum høpi, sigur Vinnunevndin.

Vinnunevndin tekur undir við uppskotinum hjá landsstýrinum um at lata Framtaki 38 milliónir krónur, sum Framtak hevur fingið í rentufríum og avdráttarfríum láni úr landskassanum, sum eginpening.

Lánið er nú rentu- og avdráttarfrítt til 15. mai í ár.

Broytingin til eginpening ger, at eginognin hjá Framtaki fer úr 80 milliónum krónum upp í 118 milliónur krónur.

Framtak kann nú seta 12 mió. kr. í eitt felag

Hetta ger, at ásetingin hjá Framtaki, sum sigur, at grunnurin í mesta lagi kann seta 10 prosent av eginognini í eitt felag, fer úr átta milliónir krónur upp í 12 milliónir krónur. 

Hetta gevur Framtaki størri rásarúm, sigur Vinnunevndin.

Sambært uppskotinum skal Framtak hava 38 mió. kr. í tøkum peningi komandi trý árini til at gera íløgur  í smáar og miðalstórar fyritøkur, millum annað íverksetarafeløg og fyritøkur, sum eru nýstovnað ella nýliga stovnað. 

Vinnunevndin sigur seg hava fingið at vita, at Framtak er ført fyri at gera tað.