Størri undirtøka fyri ES-limaskapi í Noregi

Undirtøkan fyri ES-limaskapi í Noregi er væl størri í dag enn hon var fyri tveimum árum síðan.

Tað vísir ein nýggj kanning, sum Norstat hevur gjørt fyri NRK.

1.000 fólk fingu spurningin, hvat tey høvdu valt, um fólkaatkvøða var um norskan ES-limaskap í dag. Av teimum spurdu siga 37 prosent ja til ES-limaskap. Tað eru 10 prosentstig fleiri enn í eini líknandi kanning í 2023.

Noreg, Noregi, Norra, Norðmenn

Mynd: Shutterstock.com

43 prosent siga nei til, at Noreg skal upp í ES. 18 prosent vita ikki, og 2 prosent siga, at tey høvdu ikki atkvøtt.

Í 1972, tá Danmark og Bretland fóru upp í EEC, var eisini fólkaatkvøða í Noregi. Tá søgdu 46,5 prosent ja og 53,5 prosent nei til limaskap. 

Meir enn 20 ár seinni, í 1994, var aftur fólkaatkvøða um norskan ES-limaskap. Tá søgdu 47,8 prosent ja og 52,2 prosent nei.

Hildið verður, at ótrygga heimspolitiska støðan eigur ein stóran part av orsøkini til, at tað nú eru so nógv fleiri, sum eru fyri norskum ES-limaskapi.