USA og Russland tosa saman fyrsta dagin

USA og Russland fara at tosa saman aftur fyrsta dagin, siga russiskir myndugleikar.

Talsmaðurin fyri Kreml, Dmitri Peskov, greiddi frá ætlanunum í dag. 

Fundurin verður í Saudiarabia mánadagin 24. mars. Men enn er ógreitt, hvør fer at umboða londini. 

Fyrr í vikuni tosaði amerikanski forsetin, Donald Trump, í telefon við russiska forsetan, Vladimir Putin.

Peskov skuldsetti í dag lond í Evropa fyri at arbeiða fyri militarisering, heldur enn at arbeiða fyri friði.

Russland og USA hava seinastu tíðina havt fleiri samrøður um ósemjuna um Ukraina, sum av álvara tók dik á seg, tá ið Russland gjørdi innrás í grannalandið í 2022.

Saudiarabia hevur fleiri ferðir roynt semju millum Russland, Ukraina og USA seinastu tíðina, og hevur eisini verið vertsland.