Hundasletufelagið bjóðaði amerikanarum til Grønlands

Tað er KNQK, felagsskapurin, sum skipar fyri hundasletukappingini, Avannaata Qimussersua, sum hevur bjóðað amerikansku gestunum til Grønlands. Tað vísir innlit, sum KNR, hevur fingið. 

16. februar í ár skrivaði formaðurin í felagnum, Mikkel Jeremiassen millum annað soleiðis í brævi til amerikanska verjumálaráðharran, Pete Hegseth:

"Tað er ein stór æra vegna KNQK, at bjóða tær at koma og luttaka í mætu hundasletukappingini í Grønlandi. Tað, at tú ert til staðar, kann ríka tiltakið, og samstundis leggja dent á tey sterku altjóða bondini, sum liggja undir samstarvinum í arktiska sambandinum"

Mikkel Jeremiassen hevur annars fyrr noktað fyri, at tað var KNQK, sum hevði bjóðað amerikansku gestunum.

Tað verður tó ikki Pete Hegseth, sum kemur til Grønlands, men umsitingin hjá Trump hevur boðað frá, at trygdarráðgevin Mike Walz, orkumálráðharrin Chris Wright og kona varaforsetan J.D.Vance, Usha Vance, koma á vitjan í Grønland í ovurmorgin.