Skottryggu bilarnir í Nuuk fara nú aftur til USA

Eitt amerikanskt Hercules-flogfar hevur verið í Nuuk í Grønlandi eftir amerikansku skottryggu bilunum og fólki, sum eftir øllum at døma skuldu fyrireika vitjanina hjá Ushu Vance, konu amerikanska varaforsetan, J.D. Vance.

Og eitt annað Hercules-flogfar aftrat er á veg til Nuuk.

Tað skrivar miðilin Sermitsiaq.

Tvey Hercules-flogfar komu við bilunum og fólki til Nuuk sunnudagin.

Ferðaætlanin broytt

Tá var ætlanin, at Usha Vance og trygdarráðgevin, Mike Waltz, skuldu vitja Nuuk og Sisimiut í hesari vikuni. Usha Vance skuldi millum annað hyggja at hundasletukapping í Sisimiut.

Grønlendingar hava mótmælt vitjanini, og virkandi landsstýrisformaðurin, Mute B. Egede, hevur sagt, at einki landsstýrisfólk skuldi hitta amerikanararnar. 

Nú er ferðaætlanin broytt, og vitjanin í Nuuk og Sisimiut er avlýst.

Í staðin verður farið til amerikansku Pittuffik-støðina har norðuri í Grønlandi fríggjadagin.

Og amerikanski varaforsetin, J. D. Vance, hevur boðað frá, at hann verður eisini í ferðalagnum.