Løgmaður bjóðar løgtinginum til kunning um Suðuroyartunnilin

Í morgin fáa løgtingsfólk alla ta kunning um Suðuroyartunnilin, sum tey vilja hava.

Aksel V. Johannesen, løgmaður, hevur bjóðað øllum løgtinginum í Tinganes um ta stóru tunnilsætlanina.

Fíggjarnevndin viðger nú lógaruppskotið til eina heimildarlóg um Suðuroyartunnilin, eftir at løgtingið hevði málið til 1. viðgerð herfyri.

Men tingfólk settu fleiri spurningar, og spurdu eftir øðrum tunnilsleiðum, tá málið varð viðgjørt í tinginum. 

Á kunnandi fundinum í morgin verða framløgur, og høvi verður at seta spurningar um verkætlanina, so tingfólk vita, hvat tey skulu taka støðu til í næstum.

Fundurin verður kl. 10.30 í morgin.