Ovastin á støðini í Pituffik koyrd frá

Ovastin á amerikonsku herstøðini í Pituffik í Grønlandi, Susannah Meyers, var í gjár koyrd úr starvi.

Tað boðar Space Operations Command frá, tí vantandi álit er á førleika hennara at leiða støðina, stendur í stuttum tíðindaskrivi.

Væntað verður av herovastum, at teir halda seg til hægstu reglur um atburð, serliga tá tað snýr seg um at vera óheftur í røktini av sínum uppgávum, stendur í tíðindaskrivinum.

Tíðindaskriv um uppsøgn á Pituffik

Sendi skriv

Fáa dagar eftir at amerikanski varaforsetin, J.D.Vance, vitjaði á støðini í Grønlandi, sendi Susannah Meyers, sambært miðlinum Military.com ein teldupost til øll starvsfólk á støðini, sum at síggja til skuldi styrkja samanhaldið millum starvsfólkini á støðini, har kanadiarar, grønlendingar og danir arbeiða.

- Eg skilji ikki núverandi politikk, men eg veit, at amerikanska stúranin, sum J.D.Vance tosaði um fríggjadagin, ikki endurspeglar Pituffik Space Base, stendur m.a. í teldupostinum frá frákoyrda oberstinum. 

- Eg lovi, at so leingi, sum eg eri so heppin at standa á odda fyri støðini, fara fløggini hjá okkum øllum at veittra saman, skrivar Meyers víðari í teldupostinum.

Shawn Lee, oberstur, hevur tikið við leiðsluni, skrivar Space Operations Command.