Stýrið fyri Íleggingargrunnin vil ikki ábyrgjast fyri tapsváða

Hóast stýrið í Íleggingargrunninum ivast í uppskotinum hjá landsstýrinum um at lata Vága floghavn 350 mió. kr. og Suðuroyartunlinum 350 milliónir úr grunninum, ivast løgmaður og fíggjarnevndin ikki.

Og tað ger løgtingið heldur ikki, tí tað hevur einmælt samtykt uppskotið.

Stýrið helt, at tað átti at vera tilskilað í lógini, at stýrið ikki kann ábyrgjast eftir vanligu reglunum um tapsváða í sambandi við at geva Vága floghavn og Suðuroyartunlinum rentu- og avdráttarfrí lán í tíggju og 30 ár.

Løgmansskrivstovan heldur, at tað er undirskilt, at grunnurin tekur á seg størri váða fyri tapum enn annars.

Tí kann stýrið heldur ikki ábyrgjast eftir vanligu reglunum í sambandi við hesi lán.

Fáa javnan áheitan frá øðrum fíggingarstovnum

Stýrið nevnir eisini orðini í lógarupskotinum um, at aðrir fíggingarstovnar kunnu læna teimum pengar, sum annars læna frá Íleggingargrunninum, tí Íleggingargrunnurin fer í nøkur ár ikki at kunna geva lán.

Stýrið sigur, at aðrir fíggingarstovnar í landinum heita javnan á Íleggingargrunnin um at vera við til at fíggja stórar verkætlanir.

Og áhugin hjá útlendskum lánveitarum kann skjótt minka, um búskaparstøðan í Føroyum versnar.

Hetta hevur Løgmansskrivstovan ongar viðmerkingar til í lógaruppskotinum

Men Fíggjarnevndin biður landsstýrið fylgja væl við, og um neyðugt, finna loysnir, sum líta frameftir og tryggja, at Íleggingargrunnurin aftur verður fíggingarmøguleiki hjá framtíðarverkætlanum til frama fyri undirstøðukervið