NSÍ og KÍ spæla ársins fyrsta toppdyst við Løkin í Runavík

Fult umfar er í fremstu mansdeildini í fótbólti er hetta vikuskiftið.

Fýra dystir vera í dag og byrjað verður í Sarpugerði í Norðragøtu klokkan seks seinnapartin, tá Víkingur og HB spæla.

Tveir dystir byrja klokkan hálvgum sjey - í Sørvági spæla 07 Vestur og EB/Streymur, og í Gundadali B36 og FC Suðurroy.

Toppdysturin við Løkin

Fjórði og seinasti dysturin í dag verður millum oddaliðini NSÍ og KÍ. Hann verður í Runavík, og byrjar klokkan átta.

Roknað verður við stórari áskoðarafjøld, tí sjáldan áður hava tvey lið sett seg so tungt bestu deildina. Tað bleiv staðfest, tá NSÍ í seinasta umfari smurdi HB av 7-1 í Gundadali. 

Bæði liðini hava fult stigatal undan dystinum, og NSÍ og KÍ hava eisini vunnið sjáldsama stórar sigrar, 11-0 og 10-0, móti ávikavist B68 og TB. Og bæði liðini eru á tremur við stóru føroyskum fótbóltsprofilum. 

Hjá NSÍ kunnu nevnast Brandur Hendriksson Olsen, Klæmint Olsen og Petur Knudsen. Hjá KÍ eru tað Páll Klettskarð, Hallur Hansson og Odmar Færø. 

Harður dysturin uttan fyri vøllin

Uttanfyri vøllin verður eisini ein harður dystur spældur millum fjepparafeløgini, Guliganz hjá NSÍ og Bláu bylgjuna hjá KÍ. 

NSÍ hevur tí gjørt yvirlit yvir, hvar áskoðarar til dystin kunnu parkera.

Útvarpið fer at siga frá fótbólti alt kvøld. Vit byrja eftir tíðindini á nátturða við frásøgn frá dystinum í Gøtu millum Víking og HB, og klokkan átta seta vit inn til Runavíkar til toppdystin millum NSÍ og KÍ.

Karstin Joensen er formaður í NSÍ.

Her er yvirlit yvir, hvar NSÍ mælir til, at fólk parkera í kvøld. 

NSÍ

Fimti og seinasti dysturin hetta vikuskiftið verður spældur seinnapartin í morgin, tá TB og B68 við Stórá í Trongisvági. Tann dysturin byrjar klokkan hálvgum fýra.