- Blóðtøppurin broytti meg

- Umboðanin og samansetingin á tingi er skeiklað. 

Tað sigur Eli Brimsvík, sum nú er farin frá sum formaður í Havnar Handverkarafelag. 

Hann hevur sitið sum formaður í 25 ár, men nú hann er vorðin 67 ár, er tíðin komin at leggja frá sær. 

Politiskir handverkarar mangla
Politiskt hevur hann ikki dult, at hann er javnaðarmaður, men hann hevur ongantíð verið virkin politiskt, tí hann hevur viljað umboðað allar sínar limir sum formaður í Havnar handverkarafelag.

Hinvegin heldur hann, at politiska landslagið er vorðið ov einstáttað, og at eitt nú handverkarar, arbeiðarar og onnur eru ov illa umboðað, tí løgting og landsstýri í ov stóran mun er mannað við akademikarum.

- Eftir mínum tykki er tað ikki gott fyri samfelagið. Eg haldi, at Føroya løgting eigur at vera umboðað av einum breiðum skara innan fyri allar samfelagsstættir. Tað veri seg handverkarar, arbeiðarar, fiskimenn, pedagogar og hvat veit eg. So breitt sum gjørligt. Og eg pástaði, at so hevði staðið betur til bæði fíggjarliga og í aðrar mátar í samfelagnum.

Blóðtøppur broytti lívið
Eli Brimsvík gjørdist av tilvild formaður fyri 25 árum síðan. Stutt eftir fekk hann ein blóðtøpp, og tað hevur broytt hann sum menniskja.

- Eg gjørdist meira sentimentalur, sigur hann. 

Sjálv søgan um Eli Brimsvík er serlig. Mamma hansara doyði, tá ið hann var tvey ára gamal, og hann vaks upp hjá fosturforeldrum, sum hava tikið sær væl av honum. Kanska var tað fosturpápin sum gjørdi, at hann fór handverkaravegin, tá ið samanum kom.

Ein avtala er ein avtala
Sum formaður í Havnar handverkarafelag hevur hann verið í mongum vasi, og har heldur hann tað týdningarmesta er at vera loyvalur og standa við tær avtalur, sum eru gjørdar. 

Sjálvur heldur hann ikki, at føroyska samfelagið í nóg stóran mun eggjar og stuðlar upp undir handverkarayrkini.

Hoyr alla samrøðuna við Eli Brimsvík her.