14 mánaðir í varðhaldi

Maðurin, sum er skuldsettur fyri at leggja á eina kvinnu á gøtuni við Sandá, eystan fyri fótbóltsvøllin á Argjum, skal vera fýra vikur aftrat í varðhaldinum.

Hetta er 14. mánaðurin, maðurin skal vera í varðhaldi.

Hann er í varðhaldi í Vestre fængsel í Danmark.

Eingin rættarfundur var i dag, tí maðurin góðtók sjálvboðin, at varðhaldið var longt.

Maðurin, sum er í tríatiárunum og útlendingur, hevur verið í varðhaldi síðani 28. apríl í fjør.

Serligar umstøður

Tá fólk hava verið í varðhaldi í eitt ár, skulu serligar umstøður til, skal varðhaldið leingjast.

Serligar umstøður eru í hesum málinum, metir Føroya rættur. 

Maðurin hevur einki tilknýti til Føroya. Hann kom til Føroya 20. apríl, og var tikin 28. apríl.

Maðurin noktar seg sekan.

Maðurin er ikki ákærdur enn, tí ákæruvaldið bíðar eftir einari meting frá danska Rættarlæknaráðnum, um hvørja revsing, maðurin er mettur egnaður at fáa.