KAF frídømt í Fasta gerðarrætti

Fasti gerðarrættur hevur frídømt Kommunala arbeiðsgevarafelagið í trætuni við Heilsuhjálparafelagið.

Heilsuhjálparafelagið sigur tað vera sáttmálabrot, tá heilsuhjálparar vera bidnir at arbeiða vaktir, sum eru annað enn átta tímar, tá eingin avtala er um tað við arbeiðsgevararnar.

Í sáttmálanum stendur, at arbeiðstíðin er átta tímar um dagin. 

Tó eru møguleikar at gera avtalur um frávik, um arbeiðsgongdin krevur tað.

Fasti gerðarrættur heldur, at ikki er grundarlag fyri at halda, at orðingin um átta tímar skal skiljast so bókstavliga sum Heilsuhjálparafelagið sigur og, at frávík bara kann gerast sambært avtalu við Heilsuhjálparafelagið.

Talan er tí ikki um sáttmálabrot, sigur Fasti gerðarrættur.
 
Málið byrjaði í Fasta gerðarrætti 30. mai 2023.