Okkurt er á netinum, annað ikki

Fáast pengar, verður alt savnið hjá Kringvarpinum atkomuligt í 2030.

Tað fer at kosta góðar 15 mió. kr.

Hesar upplýsingar eru í svari frá Eiriki í Jákupsstovu, landsstýrismanni, til Helga Abrahamsen, løgtingsmann.

Landsstýrismaðurin sigur eisini, at 650.000 seðlar eru í orðaseðlasavninum, sum er tøkt á netinum.

Og ljóðupptøkurnar, okkurt um 2.100 tímar við kvæðum, vísum, sangi og frásagnum, eru talgildar og eru eins og orðaseðlasavnið á heimasíðuni hjá Fróðskaparsetrinum.

Landsbókasavnið hevur savn við føroyskum tónleikaútgávum frá 1940-unum til dagin í dag. 

Savnið er ikki fullfíggjað.

Almenningurin hevur atgongd til tilfarið á Landsbókasavninum. Tað er ikki á netinum.

Nakað tilfar hjá Tjóðskjalasavninum er á netinum.

Tilfarið hjá Tjóðsavninum er atkomuligt á Tjóðsavninum og tilfar hjá bygdasøvnunum er atkomuligt á søvnunum.

Við verandi skrásetingarskipan er hetta tilfarið ikki atkomuligt á netinum, sigur landsstýrismaðurin.