Fyrstu heiðursmerkini upp á spæl í dag

Í dag byrja kappingarnar á oyggjaleikum av álvara, og í triathlon og frælsum ítrótti kappast føroyingar um fyrstu heiðursmerkini.

Magni Hansen og Bergtór Thorsteinsson eru farnir út á rutuna í triathlon klokkan 11, og seint seinnapartin skal Rutt Gregersen royna seg í 10.000 metra renning.

Felags fyri hesi eru, at kjansurin at vinna heiðursmerki verður ikki mettur at vera stórur.

Síðstu árini hevur føroysk súkkling havt ilt við at vinna medaljur á oyggjaleikum. Súsanna Skylv vann triathlon-gullið í Gibraltar í 2019, men fýra ár seinni í Guernsey kom einki heiðursmerki til høldar.

Rutt Gregersen kappast á oyggjaleikum fyri fyrstu ferð. Hon er byrjað at venja aftur fyri kortum, og hevur ikki runnoð 10.000 í kapping í ár. Tí er trupult at meta um kjansirnar, men hjá Frælsum ítrótti Føroya siga tey, at hon hevur góðar møguleikar at enda í fremru hálvu av teimum 15 rennarunum. 

Innleiðandi kappingar í frælsum ítrótti og badminton

Fleiri skulu renna innleiðandi kappingar í dag. Maria Biskopstø og Margit Weihe Fríðmundsdóttir renna hálvfinalu á 400 metrum, Jónas G. Isaksen og Dánjal Dahl Ljósheim renna innleiðandi riðlar í 400 metur renning, Julian Gregersen rennur innleiðandi kapping á 1.500 metrum, Elisabet Holm Simonsen og Oddvør Josephsen skulu royna seg í innleiðandi kapping í 100 metur renning, og tað skulu Andreas Bjarnastein Antoft og Tummas Sjóvará eisini.

Í badminton byrjaði bólkaspælið í liðkappingini í morgun, og har hava Føroyar vunnið 5-0 á Ynys Môn í sínum fyrsta dysti. Seinni eru dystir ímóti Caymanoyggjunum og Guernsey á skránni.