Nú skulu pensjónistar sleppa undan eftirrokning

Landsstýrið væntar at spara átta milliónir krónur, nú broytingar skulu gerast í lógini um pensjónir.

Almanna- og mentamálaráðið sigur, at reglurnar um umrokning og eftirrokning av fólkapensjón vera broyttar.

Pensjónin verður tillagað so hvørt, inntøkan hjá fólkapensjónistinum broytist.

Tá slepst undan eftirrokningum. Í 2023 fingu 1822 pensjónistar eftirrokning.

Og pensjónin skal gjaldast afturúr, ikki, sum nú, frammanundan.

Henda broyting verður bara verður galdandi fyri nýggjar pensjónistar. Hon ávirkar eisini rættin til pensjón í sambandi við deyða.

Eirikur í Jákupsstovu

Eirikur í Jákupsstovu, landsstýrismaður í almannamálum, eigur uppskotið um broytingar í pensjónslógini, sum nú er farið til ummælis.

Pensjón við deyða

Sambært galdandi lóg heldur rætturin til fólkapensjón uppat, tá mánaðurin, sum kemur aftaná mánaðin, pensjónistur doyr, endar. 

Nú fer tann rætturin at halda uppat, tá mánaðin, pensjónisturin doyr, endar.

Tað merkir, at doyr ein fólkapensjónistur ella fyritíðarpensjónistur í februar til dømis, fær viðkomandi bara pensjónina fyri februar. Ikki bæði fyri februar og mars sum nú.

Einki er um pensjónaldur í uppskotinum, sum nú er á veg.

Spardi peningurin til onnur almannaøki

Ætlanin er at spara átta milliónir krónur. Tær skulu brúkast til onnur almannaøki, sigur Almanna- og Mentamálaráðið.

Ætlanin er at gera støðuna betri hjá ungum og heimleysum við samansettum avbjóðingum.

Fyritíðarpensjónistar skulu fáa eftirlønarviðbót, og tey, sum missa arbeiðsinntøku, tí tey eru hjá sjúkum fólki, skulu fáa 31.000 kr. í staðin fyri 27.779 kr. sum nú.

Lógaruppskotið er sent til ummælis, og freistin at gera viðmerkingar er 9. september.

Les uppskotið her.