Trætan um Galaxy endar í Fasta Gerðarrætti

Málið um lønarviðurskifti hjá føroyskum fakfelagslimum, sum skulu manna Galaxy, er beint í Fasta Gerðarrættin

Eftir ætlan skal grikska ferjan avloysa Smyril í átta-tíggju vikur frá 23. august, meðan hann er í dokk.  

Tó er siglingin við Galaxy í vanda, tí Skipara- og Navigatørfelagið og Maskinmeistarafelagið nokta limum sínum at fara umborð, fyrr enn sersáttmáli er gjørdur fyri Galaxy.

Skundmál

Eftir samráðingar millum feløgini og Fíggjarmálaráðið, er málið í dag beint í Fasta Gerðarrættin, upplýsir formaðurin í Skipara- og Navigatørfelagnum, Annfinnur Garðalíð.

Málið verður viðgjørt sum skundmál.

Tað ber í sær, at fyrireikandi fundurin skal vera innan 24 tímar frá tí, at málið er sent gerðarrættinum, og úrskurðarfundurin skal vera innan 72 tímar.